రూ.5 కోట్లు ఇవ్వలేదని నాకు టికెట్ నిరాకరించారు: తృణమూల్ పై మాజీ క్రికెటర్ మనోజ్ తివారీ సంచలన ఆరోపణలు

పశ్చిమ బెంగాల్ రాజకీయాల్లో సంచలనం చోటుచేసుకుంది. భారత మాజీ క్రికెటర్, తృణమూల్ కాంగ్రెస్ (టీఎంసీ) మాజీ ఎమ్మెల్యే మనోజ్ తివారీ పార్టీకి రాజీనామా చేస్తున్నట్లు ప్రకటించారు. ఇటీవల జరిగిన అసెంబ్లీ ఎన్నికల్లో టీఎంసీ ఘోర పరాజయం పాలైన మరుసటి రోజే ఆయన ఈ నిర్ణయం తీసుకోవడం ప్రాధాన్యం సంతరించుకుంది. ఈ సందర్భంగా పార్టీ నాయకత్వంపై, ముఖ్యంగా మమతా బెనర్జీపై ఆయన తీవ్ర ఆరోపణలు చేశారు.

ఓ వార్తా సంస్థకు ఇచ్చిన ఇంటర్వ్యూలో మనోజ్ తివారీ మాట్లాడుతూ.. "నాకు టీఎంసీతో ప్రయాణం ముగిసింది" అని స్పష్టం చేశారు. హౌరాలోని షిబ్‌పూర్ నియోజకవర్గం నుంచి టికెట్ ఇచ్చేందుకు పార్టీ తనను రూ.5 కోట్లు డిమాండ్ చేసిందని, దానికి తాను నిరాకరించడంతో టికెట్ నిరాకరించారని ఆయన ఆరోపించారు. ఈ ఎన్నికల్లో దాదాపు 70-72 మంది అభ్యర్థులు ఇలాగే రూ.5 కోట్ల వరకు చెల్లించి టికెట్లు కొనుగోలు చేశారని సంచలన వ్యాఖ్యలు చేశారు.

పార్టీలో అంతర్గత ప్రజాస్వామ్యం లేదని, రాష్ట్ర క్రీడల సహాయ మంత్రిగా తనకు ఇచ్చిన పదవి కేవలం "లాలీపాప్" వంటిదని తివారీ విమర్శించారు. "ఏదైనా సమస్య గురించి మాట్లాడటానికి ప్రయత్నిస్తే 'మీ కోసం నాకు సమయం లేదు' అని మమతా దీదీ మధ్యలోనే ఆపేసేవారు" అని ఆయన ఆవేదన వ్యక్తం చేశారు. నాటి క్రీడల మంత్రి అరూప్ బిస్వాస్ కూడా క్రీడల గురించి ఏమాత్రం అవగాహన లేకుండా తనను పక్కన పెట్టారని ఆరోపించారు. పార్టీలో అవినీతి పెరిగిపోవడం వల్లే ఎన్నికల్లో ఓటమి తప్పలేదని ఆయన విశ్లేషించారు.

రాజకీయాలకు దూరంగా, ఇకపై క్రికెట్‌పై దృష్టి సారించనున్నట్లు మనోజ్ తివారీ తెలిపారు. ఇప్పటికే బీసీసీఐ లెవల్ 2 కోచింగ్ పరీక్షలో ఉత్తీర్ణత సాధించానని, బెంగాల్ రంజీ జట్టు హెడ్ కోచ్ పదవికి దరఖాస్తు చేసినట్లు ఆయన వెల్లడించారు.